Ég vil byrja nú á að þakka þeim sem höfðu þor og dug til að kvitta fyrir komunni, átti nú von á fleirum en sumir eru bara svo agalega feimnir.

Annars er það að frétta að ég byrjaði að hreyfa mig aðeins meira í vikunni en undan farnar vikur, byrjaði á stífluhringnum hér í Elliðarárdal með góðri vinkonu á mánudaginn.  Á þriðjudaginn fór ég í endajaxlatöku þannig að ekki var í boði að fara í ræktina fyrsta daginn á átaksnámskeiðinu sem ég skráið mig á. Var heima og bruddi parkódín og íbúfen en það er eitthvað sem ég læt mér bara eiginlega ekki til munns.

Svo leið og beið, ég mátti fara í ræktina á fimmtudag með því skilyrði að ég færi bara rólega af stað.... ég náði ekki að spjalla við kennarann fyrir tímann enda tæplega 40 æstar konur að bíða eftir að fá sína hreyfingu. Svo byrjaði tíminn sem var Salsa og þeir sem mig þekkja best vita að mér leiðist nú ekki að dansa og það endaði með því að ég dansaði af fullum krafti, hrikalega gaman. Var pínu þreytt um kvöldið en leið hrikalega vel.

Á föstudaginn hringdi ég í góða vinkona mína (um kl 20.30)og við skelltum okkur stífluhringinn góða og sonurinn með - duglegur hann.  það er nú eiginlega tvöfalt álag að fara hringinn í þessari færð en það er bara vel. Aftur þvílík vellíðan en kannski ekki æskilegt þar sem ég átti nú að taka það rólega fyrstu 5 daga frá jaxlatöku.

Á laugardaginn var svo komið að ræktinni aftur og þá var þessi fíni hjólaspinningtími... ekki gat maður verið minni en hinir og kom þaðan út alveg hundblaut en sæl af vellíðan, var ekki eins ánægð þegar harðsperrurnar byrjuðu að koma í klofið í gærkveldi (pent orðað).

Ég kíkti svo í heimsókn til góðrar vinkonu eftir þá heimsókn fór ég heim og byrjaði að moka og moka og moka og moka - var 30 mínútur á fullu að moka - enn ein hreyfingin... hehe er bara óþæg.

Um kvöldið hafði ég fengið sms um kl 19.00 um hvort við ættum að fara stífluhringinn, ég sá sms um kl 21.00 og hringdi í snarhasti sem endaði auðvitað með kraftgöngu í skafrenning gamla góða stífluhringin.... maður er nú ekki í lagi , þegar maður hefur afsökun á að hreyfa sig lítið sem ekkert, þá hamast maður eins og asni... vona að þetta komi ekki niður á mér... er reyndar ekkert að losna við bólguna við endajaxlinn....

mér er nær...

en læt þetta duga í bili -- þar til næst - over and out

Áramótin liðin og stórkostlegt ár framundan - miklar breytingar en allar á jákvæðan hátt.

Ég mun skipta um vinnu á árinu, byrja í ræktinni á þriðjudaginn, bíllinn er þegar komin með skoðun fyrir 08 alveg geggjað.

Pabbi sýnir miklar framfarir, farinn að finna fyrir miklu meiru, fann m.a. þegar bróðir minn breiddi yfir hann í gærkveldi auk þess sem hann er farinn að finna fyrir hinum ýmsu tilfinningum í brjóstholi, hefur fundið fyrir nuddi niður hryggjasúluna og hefur hnerrað. Svo er heilsufarið búið að vera svo undursamlega gott í tæpa 3 mánuði. Ef ekki er tími til að fara að heimsækja hann og gefa honum hvatningu og stuðning nú þá veit ég ekki hvenær. Ég hvet því vini, ættingja og kunningja til að kíkja á kallinn. Hann mun örugglega taka ykkur með bros á vör. Enn eins og allir vita þá er pabbi mikil félagsvera og því kærkomið fyrir hann að fá að sjá önnur andlit.

Sonur minn stækkar ört og er nú orðin jafnhár ömmu sinni (móðurömmu) hann er alltaf í boltanum en svo er hann að spá í að fara að læra á gítarinn sem ég gaf honum í jólagjöf. Hann er nú þegar búinn að semja frumsamið lag - þannig að framtíðin er sannarlega björt hjá honum.

Svo verður dásamlegt að fylgjast með systkynum og frændsytkynum á árinu enda með afburðum yndislegt fólk.

Amma - mun standa sig sem aldrei fyrr og má segja að hún sé gangandi kraftaverk.

Endilega látið mig vita hvað ykkur finnst um þetta blogg mitt, er ég að skrifa þetta út í bláinn eða sem bara örfáir lesa… veit um nokkra sem láta nafn síns aldrei getið hérna…. Komið nú úr skápnum svo ég viti meira hverjir hafa áhuga á blogginu mínu.

BÖÐVAR THOR - TIL HAMINGJU ELSKU LITLI SÆTI FRÆNDI

Skellti mér í að kaupa 1 stk átaksnámskeið í Hreyfingu og heitir það "betra form SEX", það var eitthvað við nafnið sem heillaði mig.... en á bakvið SEX-ið standa 6 tegundir æfinga eins og Pilates, pallaþjálfun, tækjaþjálfun, Salsa, Tæbó og teygjur og hjólaþjálfun.

Hlakka til að taka á móti nýju ári með fjölbreytileika, þeir sem mig þekkja vita að það er sem ég þarf. Þoli ekki einhæfni.

Hvet alla þá sem ekki hafa bókað sig í ræktina að byrja á svona námskeiði.

Halló, jæja aðfangadagskvöld liðið og allt hitt á eftir, auðvitað er maður búin að borða á sig gat eins og vanalega. Ekkert að því – bara seinni tíma vandamál, allaveganna fyrir ykkur sem eruð þvengmjó….(ein bitur) alveg ótrúlegt hvað ég er dugleg að sanka að mér þessum aukakílóum…. Ég er auðvitað safnari dauðans, þannig að það er nú kannski ekki von á öðru.  En hvað um það.

Aðfangadagur rann upp bjartur og fagur með sól í sinni og sól í hjarta fór ég með mömmu minni, yngri systur minni og syni mínum  í messu með pabba á R-2 á Grensás, það var yndisleg stund. Hluti Karlakórs Reykjavíkur söng í messunni líkt og síðustu 45 ár. Algjörlega ógleymanlegt og líka tárin sem renndu sér niður kinnarnar.

Eftir messu dvöldum við drjúga stund eða þangað til að við þurftum að gera matinn klárann (eða öllu heldur mamma) Allir í jólagallan og brunað á Grensás svo maturinn myndi ekki kólna. Borðuðum á svipuðum tíma og við erum vön í sveitinni.

Maturinn klikkaði ekki, frekar en vanalega, og kvöldið gekk eins og í sögu, sonur minn tók að sér hlutverk afans að lesa á pakkana og gekk það prýðisvel enda gott fyrir drenginn að hafa eitthvað við að vera milli pakkanna. Litli frændi var hin hressasti og vakti bara fullt af kvöldinu – algjör dúlla.

Á jóladag var nú bara legið í leti fram eftir degi, ég fór reyndar í tiltektina þegar mamma og krakkarnir fóru til pabba – íbúðin eins og eftir sprengjuárás en það var allt fínt og flott á eftir þegar ég fór upp á Grensás. Þegar þangað kom var bróðir minn mættur með konus sína og dóttur

Á 2. jóladag fórum við nokkuð snemma á fætur, forum svo til pabba eftir hádegi um kvöldið fór mamma austur með krakkana og ég lagðist til hvílu og það var frábært, var svo heima allan miðvikudaginn, las og horfði á sjónvarp og huggulegt.

Ætla svo að skella mér austur í sveit á föstudag og dvelja tæpan sólahring, er boðið í mat hjá góðum vinum. Síðan stendur til að kíkja á ömmu og líka á bróðir minn og fjölsk.

Framundan eru svo áramótin en ég , sonur minn , mamma og yngri systir mín verðum hjá pabba með annan fótin en 1. jan verður svo litli frændi skírður í Árbæjarkirkju.

Hvað skal segja ,ég er búin að klára að gera allt, nema skipta á rúmunum og skúra gólfin, allar jólagjafir klárar (fyrir utan einkasonarins en hún er ákveðin, þarf bara að sækja hana) .

Reyndar stendur til að kíkja í Sappos og athuga með jólaskó á drenginn  sem hann getur svo notað við öll tækifæri á eftir. Svo er stefnan tekin á herrafatadeild Hagkaupa þar sem kaupa á bleika skyrtu og bindi við.  Síðan liggur leiðin beint til pabba en þar verðum við fram að kvöldmat.

Í kvöld ætlar svo barnsfaðir minn og kærasta hans að kíkja við áður en þau halda í jólafrí norður á Blönduós.

Á morgun verð ég að vinna frá 10-14 og svo er það bara þrumufleygur um bæinn með mömmu, því hún er ekki alveg búin í jólagjafastússi.

Svo þurfum við að undirbúa Hulduheima á Þorláksmessu, en það er hvíldarherbergi á Grensás sem við höfum fengið til afnota á aðfangadagskvöld.  Ég hlakka bara orðið talsvert mikið til jólanna, verður gott að gleyma sér aðeins í faðmi fjölskyldunnar.

Gleðileg jól allir saman

Eftir að hafa farið smá jólaleiðangur með mömmu í gær, þá fórum ég og einkasonurinn til pabba á Grensás, um kl. 19.30 hófst jólaskemmtun á Grensás með söng Árnesingakórsins í Reykjavík, við hin tókum svo lagið með þeim, síðan var boðið upp á kaffihlaðborð og þar á eftir glöddum við hvert annað með jólapökkum. Yndisleg stund og sannkallaður jólaandi á Grensás.

Hvet alla til að taka lífinu með ró þessa dagana, ekkert liggur á, jólin koma þó eitthvað sé ógert. Aðalatriðið er að vera með hjartað á réttum stað.

Pabbi fór í rannsókn á föstudaginn, gerð var könnun á frenikus-taug og hvort hún væri í lagi, hún er í lagi og pabbi því kandídat í aðgerð. Þessi aðgerð þýðir að pabbi mun geta andað án öndunarvélar ef allt gengur eins og það ætti að ganga.

Þetta er besta jólagjöfin í ár.

Við fjölskyldan göngum því fagnandi inn í nýtt ár 2007

Vá en sá dagur – enn einn dagur sem verður ógleymanlegur.

Í dag fórum við sem leið lá frá Grensás og alla leið austur á æskuheimili mitt. Við mæðginin og systir pabba fengum að fljóta með í bílnum hjá Pabba.

Ferðin gekk glimrandi vel og sveitin tók svo sannarlega vel á móti okkur. Sannkallaður draumajólasnjór féll í stórum flygsum og sveitin var í sinni fegurstu vetrarmynd.

Mamma tók að sjálfsögðu vel á móti mannskapnum, með hátíðarlæri og öllu tilheyrandi og allt með hinni mestu snilld. Ánægjulegt að segja frá því að þessu sinni gat pabbi notið þess að borða með okkur- hann er því tilbúinn að borða með okkur jólamatinn sem við munum þessi jólin borða á Grensás. Fáum þar sér herbergi til að skreyta og gera huggulegt og þar borðum við jólamat að hætti mömmu og eigum notalega stund saman, fjölskyldan.

Yngsti meðlimur fjölskyldunnar mætti að sjálfsögðu og leyndi sér ekki gleðin hjá pabba að sjá litla drenginn. Dásamleg stund.

Amma var sótt en hún og pabbi hafa aðeins getað heyrst í síma síðan um miðjan ágúst. Bæði voru þau í hjólastól – þau eru svo miklar hetjur.

Við stoppuðum í tæpa 5 tíma og síðan var lagt í hann í bæinn.  Ferðin gekk vel og þegar ég skildi við pabba á Grensás, þá var hann brosandi hringinn, alsæll.

Ég segi nú bara GLEÐILEG JÓL

Ég er búin að segja upp í vinnunni, hvað ætti ég að fara að gera?
annað sölustarf
5%
læra eitthvað skynsamlegt
50%
finna mér ríkan kall og dingla mér
36%
finna mér fátækann mann og hlaða niður börnum..
9%
annað
0%

held að niðurstaðan sé að finna mér ríkan kall og dingla mér í skóla.... einhver ríkur kall sem hefur áhuga?? eða einhver sem getur bent mér á vænlegan kost.....

Vil benda áhugafólki um skoðanakannanir að taka þátt í minni hér á síðunni!!

Eru ekki allir til í slíkt?  Ég virðist nú vera komin í hóp hjá Gallup sem alltaf er verið að hringja í, þrátt fyrir að hafa sagt nei við því þegar ég var spurð hvort ég vildi vera í hóp sem hringt er reglulega í.  En ég tek þátt, því það eru ekki svo margir sem hringja og spjalla. Fæ því ágætis útrás fyrir málgleði mína, sem er nú mjög misjöfn.

Svo er ég ofsótt af bókaforlaginu Eddunni en ég er bara glöð þegar þau hringja, leyfi þeim kynna eitt og annað en segi svo bara nei því miður… ferlega leiðinleg.  Ég er reyndar búin að kaupa rosalega mikið af þeim og kannski komin tími á að ég fari að lesa eitthvað af þessum bókum.  Ég er sérlegur áhugamaður um fallegar og fræðandi bækur.  Elska bækur en ótrúlega duglega að fá á mig sektir á bókasafninu – þessi mánuður líður bara alltaf svo hratt. Ég er búin að borga sem nemur nokkrum ársgjöldum í bókasafnssektir… hvað er málið.. þarf að taka mig á þar, ætli það verði ekki næsta áramótaheit

Talandi um áramótaheit – á að setja sér eitt slíkt?? Endilega gefið komment

Jæja er ekki komin tími á smá blogg…. Held það.

Allt gott að frétta af pabba – vildi bara sjá fleiri vini og ættingja heimsækja hann, fyrihluti laugardags og sunnudags þ.e frá hádegi til kl. 15.00 eru góðir dagar að kíkja til pabba. Hann er eldsprækur og við góða heilsu og því hvet ég enn og aftur vini og ættmenni að kíkja við.  Eins og þeir sem þekkja pabba, vita, að þá er honum mikilvægt að fylgjast með mönnum og málefnum og því ekki spurning að kíkja við.  Húmorinn brennur á vörum hans og ekki von á öðru en skemmtilegri heimsókn.

Allt gott að frétta af nýbökuðum foreldrum og litla jólaenglinum, áætluð heimför er á morgun þriðjudag. Erum bara ánægð með hvað hann er hress, enda komin af einmuna hressu fólki Hann stefnir líka í að verða mikill söngmaður, kann að þenja lungun sem er mjög gott. Veit að systir mín á eftir að syngja mikið fyrir hann og það á hann eftir að nýta sér í framtíðinni. Svo verður hann mikill fótboltamaður enda pabbinn duglegur að spila og eiga hann og fleiri ættingjar eftir að hjálpa honum við að rækta þá hæfileika. Veit allaveganna að sonur minn er tilbúinn í að aðstoða við þá þjálfun.  Eina spurningin er hvort hann mun halda með Man.United eða Arsenal….

Þegar ég var lítil hélt ég alltaf með Man.United eins og stóri bróðir en svo kom tímabil sem ég hélt bara með liðinu sem vann. Enn svo lærði ég að eini sannleikurinn var Man.United.  Sonur minn er búinn að fara hringinn, vildi nú ekki vera sammála mömmu sinni, gekk meira að segja svo langt að halda með Liverpool…. En eins og ég forðum daga þá fann hann að lokum sannleikann.  Það er spurning hver verður sannleikur litla frænda

Við mæðgin skelltum okkur í heimsókn í gær til nýbakaðra foreldra og sonar á fæðingardeildina í Rvk. Svona áður en þau flyttu sig yfir á spítalann á Selfossi.

Litli snáðinn, hinn brattasti og mikill kraftur í honum, engin fyrirburabragur á frænda.. Hann var nú ekkert að opna augun of mikið en þegara þau opnuðust, þá var sko bjart yfir mínum.

Sonur minn var svo upprifin, ætlar sér sko að verða mikill og góður frændi sem kennir honum fótbolta og ýmislegt annað.

Ég fór svo með myndir til pabba seinnipartinn í gær, hann var ekkert smá ánægður, sýndist hann sjá afahöku á stráknum.  Það er reyndar rétt, munnsvipurinn minnir mjög mikið á pabba. 

Auðvitað prentaði ég myndirnar í A4 og límdi upp á vegg svo pabbi gæti nú virt nýjasta meðlim fjölskyldunnar fyrir sér.

Það er því bjart framundan – jólin að koma og nú er bara að skreyta og baka, skrifa á jólakort og hafa það huggulegt á aðventunni.

Njótið samverunnar á aðventunni

Í nótt sem leið kom í heiminn lítill engill sem ekki ætlar að missa af jólunum.

Systir mín (sú eldri) og kærasti hennar eignuðust yndislegan lítinn strák kl 03.38, fæddur vó hann 12 merkur og á lengdina er hann 48,5 cm, öllum heilsast vel.

Upphaflega  var litli sæti strákurinn áætlaður í heiminn 25.des. En hann ákvað að ráða þessu sjálfur og bætast í hópinn hjá nóvemberafmælisbörnum og býð ég honum velkominn í þann hóp.

Elsku ÞT og GÁB til hamingju með litla engilinn.

Neyðarástand í Blóðbankanum

Neyðarástand hefur skapast í Blóðbankanum í Reykjavík vegna skorts á blóði. Mikil veikindi og slys að undanförnu hafa valdið því að notkun á blóði og blóðhlutum hefur verið mikil. Blóðbankinn þarf á um 70 blóðgjöfum að halda á degi hverjum til að anna eftirspurn heilbrigðisstofnanna um allt land. Það hefur alls ekki náðst að undanförnu, þrátt fyrir að auglýst hafi verið eftir blóðgjöfum fyrir tveimur vikum með góðum árangri.